Монгол Улсаас Унгар Улсад суугаа ЭСЯ

ЭЛЧИН САЙД Н.ЭНХТАЙВАН УНГАР УЛСЫН ГАДААД ХАРИЛЦААНЫ ЯАМНЫ ЗҮҮН АЗИЙН ГАЗРЫН ЗАХИРАЛ ТАМАШ МАТУРОТОЙ УУЛЗАВ

Монгол Улсаас Унгар Улсад суугаа Элчин сайд Н.Энхтайван Унгар Улсын Гадаад харилцааны яамны Зүүн Азийн газрын захирал Тамаш Матуротой 2026 оны 10 дугаар сарын 29-ний өдөр уулзлаа.

Уулзалтын эхэнд Элчин сайд Н.Энхтайван шинээр томилогдсон захиралд баяр хүргэж, Монгол, Унгарын уламжлалт найрсаг харилцаа, хамтын ажиллагааны өнөөгийн байдлын талаар танилцуулав.

Уулзалтаар талууд хоёр орны улс төрийн харилцааг бэхжүүлэхийн зэрэгцээ худалдаа, эдийн засаг, тээвэр, логистик, эрүүл мэнд, боловсрол, соёлын салбарын хамтын ажиллагааг өргөжүүлэх боломжийн талаар санал солилцов.

Түүнчлэн хоёр улсын хооронд шууд нислэг үйлдэх боломжийг судлах, хоёр орны жижиг, дунд бизнес эрхлэгч хооронд холбоо тогтоох, Унгар Улсад оршин суугаа монгол иргэдийн эрх, хууль ёсны ашиг сонирхлыг хамгаалах, тэдэнд тулгамдаж буй асуудлыг шийдвэрлэх зэрэг чиглэлээр хамтран ажиллахаар тохиролцлоо.

УНГАР УЛСЫН 1956 ОНЫ ХУВЬСГАЛ, ЭРХ ЧӨЛӨӨНИЙ ТӨЛӨӨХ ТЭМЦЛИЙН 70 ЖИЛИЙН ОЙН ДЭЭД, ӨНДӨР ТҮВШНИЙ АРГА ХЭМЖЭЭНД ОРОЛЦОВ

2026 оны 10 дугаар сарын 23-ны өдөр зохион байгуулсан Унгар Улсын 1956 оны хувьсгал, эрх чөлөөний төлөөх тэмцлийн 70 жилийн ойн дээд, өндөр түвшний арга хэмжээнд Монгол Улсын Ерөнхий сайдын Аюулгүй байдал, гадаад бодлогын зөвлөх Н.Чимгүүндарь, Монгол Улсаас Унгар Улсад суугаа Элчин сайд Н.Энхтайван нар оролцов.

Хүндэтгэлийн ёслол Парламентын ордонд эхэлж, Унгар Улсын Ерөнхийлөгч Андраш Бака нээж үг хэлэв. Түүнчлэн Европын Комиссын Ерөнхийлөгч Урсула фон дер Лайен, Европын зөвлөлийн Ерөнхийлөгч Антониу Кошта болон НАТО-гийн Ерөнхий нарийн бичгийн дарга асан, Норвегийн Сангийн сайд Йенс Столтенберг нар хүндэт зочноор оролцож мөн үг хэлсэн болно.

Ёслолын арга хэмжээ Кошшут Лайошийн талбайд үргэлжилж Унгар Улсын Ерөнхий сайд Петер Модьёр талбайд хуран цугларсан гадаадын зочид төлөөлөгч, унгарын иргэдэд хандан 1956 оны хувьсгал, эрх чөлөөний төлөөх тэмцлийн түүхэн ач холбогдлын талаар илтгэл тавив.

Арга хэмжээ үдээс хойш Гала тоглолтоор үргэлжилж, Унгар Улсын Ерөнхий сайд Петер Модьёр гадаадын дээд, өндөр түвшний төлөөлөгчдийг хүндэтгэн оройн зоог барьснаар өндөрлөсөн болно.

Унгар Улсын 1956 оны хувьсгал, эрх чөлөөний төлөөх тэмцлийн 70 жилийн ойг ёслол төгөлдөр тэмдэглэж, арга хэмжээнд гадаадын 40 орчим улсын төлөөлөгчид хүрэлцэн ирлээ.

Монгол Улсын хувьд Унгар Улстай уламжлалт найрсаг, харилцаа хамтын ажиллагаатай бөгөөд хүндэтгэлийн ёслолд Засгийн газрыг төлөөлөн төлөөлөгч оролцуулсан нь хоёр орны хамтын ажиллагаанд онцгой ач холбогдол өгч буйн илрэл боллоо.

УНГАРЫН 1956 ОНЫ ХУВЬСГАЛ, ЭРХ ЧӨЛӨӨНИЙ ТӨЛӨӨХ ТЭМЦЛИЙН 70 ЖИЛИЙН ОЙH ТӨРИЙН ДАЛБАА МАНДУУЛАХ ЁСЛОЛД ОРОЛЦОВ

Монгол Улсаас Унгар Улсад суугаа Элчин сайд Н.Энхтайван Унгарын 1956 оны хувьсгал, эрх чөлөөний төлөөх тэмцлийн 70 жилийн ойг тохиолдуулан зохион байгуулсан Унгар Улсын төрийн далбааг мандуулах ёслолын арга хэмжээнд оролцов.

Энэхүү ёслол нь 1956 оны хувьсгал, эрх чөлөөний төлөөх тэмцэлд оролцсон эх орончдын дурсгалыг хүндэтгэх, Унгарын ард түмний эрх чөлөө, үндэсний тусгаар тогтнолын төлөөх тэмцлийн түүхэн ач холбогдлыг эргэн санахад чиглэсэн арга хэмжээ боллоо.

1956 оны 10 дугаар сарын 23-ны өдөр Унгар Улсад эхэлсэн хувьсгал нь Зөвлөлтийн нөлөө, тухайн үеийн коммунист дэглэмийн эсрэг өрнөсөн ард түмний хөдөлгөөн бөгөөд улс төрийн эрх чөлөө, үндэсний тусгаар тогтнол, өөрийн хувь заяаг бие даан тодорхойлох эрхийн төлөөх тэмцлийн бэлгэ тэмдэг болон түүхэнд үлдсэн юм.

ЭХЛЭЛ 2К АРГА ХЭМЖЭЭГ ЗОХИОН БАЙГУУЛАВ

Монгол Улсаас Унгар Улсад суугаа Элчин сайдын яам, Унгар дахь Монгол оюутны холбоо (УМОХ)-той хамтран жил бүр уламжлал болгон зохион байгуулдаг «Эхлэл 2К» арга хэмжээ 2026 оны 10 дугаар сарын 17-ны өдөр зохион байгуулав.

Элчин сайд Н.Энхтайван өөрийн оюутан ахуй цагийн туршлага, амьдралдаа баримталдаг зарчмуудаасаа хуваалцаж, оюутнуудад захиас зөвөлгөө өгөв. Элчин сайд Монгол хүний хамгийн том бахархал бол эх орон гэдгийг онцлон, гадаадад суралцаж буй залуус эх орныхоо нэр төрийг өндөрт өргөж явахын чухлыг сануулж, оюутнуудад сурлагын өндөр амжилт хүслээ.

Элчин сайдын яамны зүгээс монгол оюутнуудад үзүүлдэг консулын үйлчилгээний төрөл, суралцахтай холбоотой асуудлаар яамнаас үзүүлж болох дэмжлэгийн талаар мэдээлэл өглөө. УМОХ-ын тэргүүн Б.Бурмаа оюутны холбооны үйл ажиллагаа, жил бүр зохион байгуулдаг арга хэмжээнүүдийг танилцуулав.

Мөн Унгар Улсад шинээр суралцахаар ирсэн оюутнуудад их сургуулийн сургалтын тогтолцоонд хэрхэн дасан зохицож, хичээлдээ үр дүнтэй суралцах, оршин суух болон суралцахтай холбоотой бичиг баримтаа бүрдүүлэх талаар практик зөвөлгөө өгөв. Унгар дахь Монголчуудын холбооны тэргүүн асан, өмгөөлөгч, хуульч Ч.Энхбат Унгар Улсын дотоодын хууль тогтоомж, эрх зүйн асуудлаар, ЭЛТЭ их сургуулийн докторант Э.Дөлгөөн Унгар Улсад чөлөөт цагаа хэрхэн үр бүтээлтэй өнгөрүүлэх талаар тус тус зөвөлгөө, мэдээлэл өгөв.

Элчин сайдын яам Унгар Улсад суралцаж буй нийт монгол оюутнуудад сурлагын өндөр амжилт хүсэж, эзэмшсэн мэдлэг, ур чадвараараа эх орныхоо хөгжилд хувь нэмрээ оруулах, эх орондоо хэрэгтэй мэргэжилтэн болохыг ерөөе.

ГҮЕМ СУРГУУЛИЙН СУРАГЧИД ЭЛЧИН САЙДЫН ЯАМАНД ЗОЧЛОВ

Унгар Улс дахь «Гүем» монгол сургуулийн хүүхдүүд Монгол Улсаас Унгар Улсад суугаа Элчин сайдын яаманд зочиллоо.

Хүүхдүүд Монгол гэр, монгол ахуйтай танилцах хичээлд хамрагдаж, гэрийн бүтэц, зохион байгуулалт, монгол айлын уламжлалт ахуй амьдралын онцлогтой ойроос танилцлаа. Гадаадад өсөж буй монгол хүүхдүүдийн хувьд эх орныхоо соёл, ахуйг биеэр мэдэрч, сурч мэдэх нь үндэсний ухамсар, өв уламжлалаа хадгалахад чухал ач холбогдолтой юм.

Энэ үеэр Элчин сайд Н.Энхтайван хүүхдүүдтэй уулзаж, эх хэлээ сурч эзэмших нь монгол хүн байхын үндэс болохыг онцлон тэмдэглэв. Тэрээр хүүхдүүдийг эх хэлээрээ алдаагүй уншиж, бичиж сурахыг захиж, сурлагын өндөр амжилт хүслээ.

ЭЛЧИН САЙД Н.ЭНХТАЙВАН “1242: ӨРНӨДИЙН БОСГОН ДЭЭР” КИНОНЫ ЕРӨНХИЙ НАЙРУУЛАГЧ ПЕТЕР ШУУШ, ПРОДЮСЕР КОРНЕЛ ШИПУШ НАРТАЙ УУЛЗАВ.

Элчин сайд Н.Энхтайван Монголын Их хаан Батын Европ дахь аян дайнаас сэдэвлэн бүтээсэн Унгарын “1242: Өрнөдийн босгон дээр” түүхэн уран сайхны киноны ерөнхий найруулагч Петер Шууш, продюсер Корнел Шипуш нартай уулзалт хийлээ.

Уулзалтын үеэр уран бүтээлчид киног хэрхэн бүтсэн талаар сонирхолтой яриа өрнүүлж, одоо ажиллаж буй түүхэн сэдэвт кино, төслүүдийнхээ талаар танилцуулав.

Элчин сайд Н.Энхтайван Монголын эзэнт гүрний үеийн түүх, соёлыг кино урлагаар дамжуулан олон улсад сурталчлан таниулж, хоёр орны соёлын хамтын ажиллагааг улам бүр гүнзгийрүүлж буй эрхмүүдэд талархлаа илэрхийлэв.

ЭЛЧИН САЙД Н.ЭНХТАЙВАН УНГАРЫН ҮНДЭСНИЙ АССАМБЛЕЙН ДАРГА АГНЕШ ФОРШТХОФФЕРТОЙ УУЛЗЛАА.

Элчин сайд Н.Энхтайван Унгарын Үндэсний Ассамблейгаас 2026 оны 9 дүгээр сарын 30-ны өдөр зохион байгуулсан дипломат арга хэмжээнд оролцох үеэрээ Унгарын Үндэсний Ассамблейн дарга хатагтай Агнеш Форштхоффертой уулзаж, хоёр орны харилцаа, хамтын ажиллагааны талаар санал солилцов.

Уулзалтын үеэр Элчин сайд Н.Энхтайван Монгол, Унгарын улс төрийн харилцан ойлголцол, дипломат хамтын ажиллагаа, парламент хоорондын харилцааны өнөөгийн байдал, цаашдын хөгжлийн талаар танилцуулж цаашид хоёр орны худалдаа, эдийн засгийн харилцааг өргөжүүлэн хөгжүүлэхэд дэмжлэг үзүүлж, хамтран ажиллахыг унгарын талаас хүсэв.

Унгарын Үндэсний Ассамблейн дарга Агнеш Форштхоффер Монгол, Унгарын харилцаа, хамтын ажиллагааг өндөр үнэлж цаашид бүхий л салбарт өргөжүүлэн хөгжүүлэхэд анхаарч, дэмжин ажиллахаа илэрхийлэв.

ЭЛЧИН САЙД Н.ЭНХТАЙВАН СЕРБИЙН ХУДАЛДАА, АЖ ҮЙЛДВЭРИЙН ТАНХИМЫН ТӨЛӨӨЛӨГЧИДТЭЙ УУЛЗАВ

Монгол Улсаас Бүгд Найрамдах Серби Улсад хавсран суугаа Элчин сайд Н.Энхтайван Сербийн Худалдаа, аж үйлдвэрийн танхимын Ерөнхийлөгчийн зөвлөх Радман Шелмичтэй 2026 оны 9 дүгээр сарын 14-ний өдөр уулзлаа.

Уулзалтын үеэр Элчин сайд Н.Энхтайван Монгол Улсын эдийн засгийн нөхцөл, худалдаа, хөрөнгө оруулалтын нөөц бололцооны талаар танилцуулав. Түүнчлэн Монгол, Сербийн эдийн засгийн харилцаа, хамтын ажиллагааг эрчимжүүлэх талаар санал солилцож, цаашид хоёр талд харилцан ашигтай салбарт хамтарсан төсөл, хөтөлбөр хэрэгжүүлэх санал дэвшүүлэв.

Талууд эдийн засгийн уламжлалт салбаруудаас гадна цахим шилжилт, мэдээлэл, харилцаа холбооны салбарт хамтран ажиллах эрмэлзэлтэй байгаагаа уулзалтын үеэр илэрхийлэв. 

ЭЛЧИН САЙД Н.ЭНХТАЙВАН СЕРБИЙН ГАДААД ХАРИЛЦААНЫ ЯАМНЫ ТӨЛӨӨЛӨЛТЭЙ УУЛЗЛАА

Элчин сайд Н.Энхтайван Сербийн Гадаад харилцааны яамны Ази, Австрали, Номхон далайн орнуудын газрын Захирал Елена Маркович-Крстичтэй 2026 оны 9 дүгээр сарын 14-ний өдөр уулзав.

Уулзалтын эхэнд Элчин сайд Н.Энхтайван уламжлалт найрсаг харилцаатай Монгол Улс, Бүгд Найрамдах Серби Улсын хооронд дипломат харилцаа тогтоосны 70 жилийн ой энэ онд тохиож буй бөгөөд хоёр улсын харилцан ойлголцол энэ хугацаанд тогтмол өргөжин бэхжиж ирснийг онцлов.

Уулзалтаар талууд хоёр талын харилцааны өргөн хүрээтэй асуудлаар дэлгэрэнгүй санал солилцлоо.

Элчин сайд Н.Энхтайван ажиллах хугацаандаа хоёр орны харилцааг улам өргөжүүлж, шинэ түвшинд гаргах, ялангуяа эдийн засгийн хамтын ажиллагааг эрчимжүүлэхэд онцгой анхаарал хандуулан ажиллахаа мэдэгдэв.

ЭЛЧИН САЙД Н.ЭНХТАЙВАН СЕРБИЙН АЯЛАЛ, ЖУУЛЧЛАЛ, ЗАЛУУЧУУДЫН ЯАМНЫ ТӨЛӨӨЛӨЛТЭЙ УУЛЗЛАА

Монгол Улсаас Бүгд Найрамдах Серби Улсад хавсран суугаа Элчин сайд Н.Энхтайван Бүгд Найрамдах Серби Сербийн Улсын Аялал жуулчлал, залуучуудын яамны Олон талт хамтын ажиллагааны группийн захирал Ивана Вельковичтой 2026 оны 9 дүгээр сарын 14-ний өдөр уулзав.

Уулзалтаар Элчин сайд Н.Энхтайван Монгол Улсын аялал жуулчлалын салбарын өнөөгийн нөхцөл байдлын талаар танилцуулж, Монгол, Сербийн аялал жуулчлалын хоёр талын хамтын ажиллагааг хөгжүүлэх хүрээнд иргэд хоорондын харилцааг өргөжүүлэх, оюутан, залуучуудын солилцооны хөтөлбөр хэрэгжүүлэх асуудлаар санал солилцов.

Талууд мөн шууд нислэг үйлдэх, визнийн нөхцөлийг хөнгөвчлөх боломжийг судалж, хамтын ажиллагааг бэхжүүлэхээ илэрхийлэв.

Уулзалтын төгсгөлд Бүгд Найрамдах Серби Улсын нийслэл Белград хотноо 2027 онд зохион байгуулах “Белград экспо 2027”-д Монголын төлөөлөгчдийг оролцуулахад сербийн талаас бүхий л талаар дэмжлэг үзүүлж, хамтран ажилахаар тохиролцлоо.